اسعار العملات

في السلك.. بابكر سلك: ضقلها يتلولح


 *بعدما (كاس) جابت ضقلها إتلولح.

*إنصرف الناس عن فريق الكرة .

*ودخلوا في مغالطات ومناكفات.

*أي زول قرأ القرار من الزاوية البتريحو.

*وأي زول فسر القرار التفسير البريحو ولو كان مكابراً.

*ذكروني نكتة.

*زماااان في دارفور.

*قالوا كان في قرية.

*القرية دي فيها مسجد.

*وفيها بيتين أو خشم بابين.

*أولاد حامد.

*وبحسب لهجة المنطقة بقولوا ليهم عيال هامد .

*وأولاد عبدالرحيم .

*وبقولوا عليهم عيال اندالرهيم.

*الإمام بتاع المسجد كان من عيال هامد.

*يوم الجمعة صعد المنبر للخطبة.

*إكتشف أنو تسعين في المية من الحضور من أولاد عبدالرحيم .

*إتغاظ شديد.

*وكان موضوع الخطبة تفسير سورة التين.

*فسرها على طريقة تفسير أهل المريخ لقرارات (كاس ).

*حا أحاول أكتب التفسير حسب لهجة الإمام.

*الليلة في سورة التين.

*ربنا ذكر التين والزيتون.

*تين تعرفا وزيتون ياها تاكلا ده.

*وطور سنين ده تراها جبل مرة القاعد ده .

*وهذا البلد الأمين

*والبلد الأمين ترا دارفور ده.

*ربنا ذكر إنا .

*وورد الجمع للتعظيم.

*وذكر بعد ذلك خلقة الإنسان .

*قال خلق الإنسان في أحسن تقويم.

*وده تره ايال هامد ديل.

*ثم ردده أسفل سافلين.

*وده تره ايا أندالرهيم ديل .

*الزول ده فسر سورة عظيمة بحسب استراتيجتو .

*كبر بالتفسير كومو.

*المهم.

*إنشغل الناس.

*وكترت البيانات.

*وإختلف الناس.

*ما إتفقوا إلا على عدم شرعية حازم ومجلسو.

*سوداكال قال في القرار إعتراف به والغاء لعيال اندالرهيم.

*وحازم قال القرار صاح استبعد عيال اندالرهيم لكن كمان ما إعترف بعيال هامد.

*يعني قرار قضى بأن يكون مسجد القرية بلا إمام.

*لا من عيال هامد .

*ولا من عيال اندالرهيم .

*ولسة عيال اندالرهيم بصرفوا على المسجد.

*إن كان القرار مكن عيال هامد.

*استلموا ولا راجيين الأوقاف تسلمهم؟.

*الأوقاف ذاتها ضقلها يكركب .

*المهم

*أثبت بشة أنه مكسب.

*وأثبت ودنوباوي أنه كبير.

*بدون معسكر سنة برة البلد .

*بدون أجهزة فنية أجنبية.

*بدون ضوضاء .

*بدون أجانب.

*أدخل المريخ والهلال في فتيل.

*فاز الهلال على ودنوباوي بهدف أوف يخجل.

*وفاز المريخ بهدف صدفة و(أستروبيا ).

*وكسب ودنوباوي إحترام الجميع.

*لأنه أثبت أن أجانب المريخ وأجانب الهلال مامحترفين.

*ديل مجرد مغتربين.

*وده دليل على تواضع العقلية التي تدير الناديين الكبيرين.

*وتفيد بالكرتجية والأرزقية والسماسرة الذين يكون لهم القدح المعلى في جلب الأجانب.

*والله ديل مرة يجيبوا لينا واحد سعران .

*ياخ قبل كدة جبنا محترف عندو(بواسير).

*المشي غالبو.

*إتعالج وشال الفيها النصيب ورجع أهلو.

*أيها الناس .

*إن تنصروا الله ينصركم.

*أها

*نجي لي شمارات والي الخرتوم.

*كان شفت يا والينا.

*السفينة دقشت السفينة وكشحت السخينة .

سلك كهربا

ننساك كيف والكلب قال السفينتين الإتداقشن يشيلن شيلتن…البارجة جاااااااتن .

وإلى لقاء .

سلك



المصدر من هنا

زر الذهاب إلى الأعلى