اسعار العملات

صبري محمد علي (العيكورة) يكتب: قال ليهو (العهد الذي بيننا وبينكم .. البوكسي)


ما كنت اود التوقف طويلاً . امام كلمة (مك) اهلنا قبيلة الجموعية السيد عجيب الهادي الاخيرة رداً او تعليقاً على ما ورد فى كلمة للسيد النائب بدارفور مؤخراً ولقد التزمت الصمت حينها ولكن وقد وصلني تسجيل حديث يبدو انه جاء بعد (المشاترة) اللفظية الاسفيرية التي (كنا نتابعها) بصمت كان احد طرفيها ما نسب لقبيلة البطاحين ومنها ما هو داخلي بالجموعية .

يقول التسجيل الاخير للسيد (عجيب) …..

 بعد ان عرف نفسه مروراً بعدد مقدر من اجداده المكوك ويختمه ب (رضي الله عنهم جميعاً)

السيد المك عجيب قال ….

(ما معناتو)

ان هناك كلام حايم بان هناك اعتذار ستتقدم به قبيلته للسيد النائب عطفاً على كلامه بتاع (البوكسي) … ملخصه ان الكلام  ده ما صاح ومافي اعتذار ونحن الدين ده سنحميه بانفسنا …

طيب يا صاحبي ….

  اكيد مع مشاغل الدنيا والجري ورا المعايش حاتكون نسيت او انشغلت و عاوز تعرف قصة (بوكسي عجيب) ده شنو؟ صاح؟

تتذكروا (زماااان) السيد النائب لمن قال (براهو) انه (رشه) على زعماء الادارة الاهلية الف ومائتين بوكسي وفى احدى الروايات انها (دبل كاب) ! تتذكروا الكلام ده …؟

 وخطابات السيد حميدتي (الايامات ديك) كانت كلها مع الدين ونصرته مؤكداً انه خط احمر وكده .

اهااا ….

اهلنا ناس الطرق الصوفية وزعماء القبائل يا مؤمن يا صديق الله اكبر ، الله اكبر  كبروا وهتفوا للراجل وشكروه على زياراته ليهم واى زول ….

 جاهو (بوكسي) هدية من السيد النائب طبقوا و(قشه خشمو)

اهااا في ما يبدو لى …

 ان السيد حميدتي نسى الموضوع ده او ان مستشاريه طمنوه خااالس على ان الادارة الاهلية دى بقت فى (جيب الساعة) وكده …

امشى انت يا المبروك قول كلامك يوم داك اننا وقعنا وكراعنا فوق رقبتنا و والسفارات مسيرانا بارادتنا وكلام بالشكل ده والكلام (روووح) للادارة الاهلية والفلول و (الما) فلول وكلام بالشكل ده !

(مك الجموعية) ……..

اظنه ما عجبو الكلام ده ..

برأيي الشخصي ان السيد عجيب كان اشجع (البكاسة) !

قول لى كيفن ؟

لانه كان ممكن يختشي ويلبد زيو زي غيرو . على الاقل يخجل هو (قبيييل) شايلو ليه ….!

(لا) الراجل واجهة غلطته او (غشتو) بشجاعة منقطعة النظير وارسل رسالته الصوتية الاولى بتاعت العهد الذى بيننا وبينكم (البتاع) وتعال شيلو !

وإن كان (المك) خرم تخريمات لم يكن لها داعي

 حين قال …

 (الخرتوم دي حقتنا) وكده ويقصد قبيلته .

(ياااا) السيد عجيب ياخ خلينا فى موضوع (البوكسي) بعدين ملكية الخرطوم لن يختلف حولها اهل السودان صدقني .

  طيب (مقطع الفيديو) الاخير الذى اشرت اليه قال فيه (المك) …

 وصلتنا بعض الاخبار من ان هناك (نية) اعتذار للسيد النائب من قبيلته نافياً ذلك . مؤكداً على ان (الدين خط احمر)

 لكن (ما جاب) سيرة البوكسي !

بل ذكر الفريق البرهان ورئيس جهاز المخابرات بان لهم اراض سبق ان منحتها قبيلته للجيش ب منطقة (الصالحة) و (فتاشة) والان بها معسكرات للدعم السريع (وعاوزين واطاتهم) !

ياااا السيد (المك) ….

(ابوس ايدك) خلينا نحل مشكلة (البوكسي) وبعدين نشوف الواطة واللا شنو يا جماعة .

اما كلامي انا فهو ……

يا جماعة (كدي باركوها)

 اولاً السيد النائب وانتو عارفين البير وغطاه رجل طيب وعلى نياتو فما تمسكوا ليهو فى كل كلمة قالها وتطيروا بيها السماء .

وبالله عليكم الزول ده لو ما طيب بقول ليكم ….

  (وقعنا وكراعنا فوق رقبتنا)

بالله لو قعدتوا مائة عام (اكان) السيد الرئيس سيقولها لكم ؟

(خلاس) يا جماعة السيد النائب وقالها ليكم (وقعنا)

 (فى شنو تاني) ؟

وبعدين يا السيد (المك) عجيب

ياخ خلى (بوكسيك) عندك الزول ده ما سألك منه .

 والدين لن يحرسه (بوكسي) ولا (لكزسس) الدين دونه المهج والارواح .

فما تشيلوا هم الموضوع ده وتدخلوا لينا فيهو (الحديد) .

 وكلام المايكرفونات ده ياخ ما تركز معاهو شديد

(الله يرضى عليك) .

قبل ما انسى: –

زعماء الادارات الاهلية وكل من وصلته عطية حكومية (بوكسي واللا غيرو) … وبقت ليهو حارة

مش ما عاوزها؟

تبيعو طوااالي واقرب فقير او عيان او جمعية رعاية ايتام او فرش مسجد ! او مدرسة محتاجة لاجلاس او ما فيها سقف (كلوكلو) وديها ليهم

 ياخ الصيدليات دي …

 لو وقفتو قدامها فلن تعدموا المحتاج .

(فما) تعقدوا المواضيع ساكت …

  انفقوها لوجه الله وارجعوا لل … (٧٨) بتاعاتكم إن وجدت !



المصدر من هنا

زر الذهاب إلى الأعلى