اسعار العملات

العيكورة يكتب: يا خال !


بقلم . صبري محمد علي (العيكورة)

موضوع رجوع المفصولين تعسفيا لاعمالهم (واللذين هم اولاد لزينا) اساسا لانهم اسلاميين فى المقام الاول وليس لديهم اي جريرة ارتكبوها وموضوع (الليلة الحكاية كلها مواضيع) وموضوع اطلاق سراح قيادات الاسلاميين و علو الصوت باطلاق سراح البقية و موضوع الافطارات الجماعية هذه المواضيع اصبحت (ماكلا جمبه) مع ناس كثر وبلغني ان منهم من ادخل المستشفي بسبب هذه الاخبار (الغير سارة) . القضاء وحكم (تاني فى شنو يا عب باسط) ؟

احد الصحفيين كتب يقول للاسلاميين (البرهان حا يبلكم) وذكرهم بموقف السادات مع الاخوان المسلمين فى مصر وكيف استغلهم ككرت قبل ان يودعهم السجون (الصحفي المسكين) لجأ للمقارنة الظاهرية واسقط الفهم وتغير الظرف المكاني والزماني فلا البرهان هو السادات ولا اسلامي مصر هم كيزان السودان ونقول لمثل هذا اتركوا الكيزان ما تركوكم فما زالت ذاكرة التاريخ فتية لم تنسي اصحاب الحظوة (الانقاذية) والكراسي الخلفية والرحلات الرئاسية والمؤتمرات الصحفية فالملف ده حقو شنو؟ تخلو مقفول يا (عب باسط) .

نقل موقع (متاريس) عن الخال حميدتي انه خاطب افطارا جماعيا بشرق النيل يوم امس الاول سخر من مقطع للزعيم (ترك) وهجومه عليه واصفا ذلك بالاحلام المغرضة ومعني الكلام يا جماعة (حسب فهمي) ان العلاقة بينه و بين (عمنا) ترك سمن على عسل لدرجة ان الخال قال لو ترك ده (كتل) ولدي عديل عافي ليهو !! يا اخونا فى حب تاني اكتر من كده؟

وكان يمكن الكلام ان يتوقف هنا لو ان حميدتي (خته) المكرفون فى السجادة لكن الخال اخد ليهو (تهويمة سياسية كدة) و بالمناسبة يا جماعة كلمة (الخال) دي ما (حقتي) انا . دي قالا السيد مفرح وزير الشؤون الدينية نعم مفرح (المعزول) اااي معزول ما لازم ياخد حقه الاعتباري واللا شنو يا جماعة؟ فهو من قال الزول ده فى الحساب خالو خلاس ياخ ناخدا بمعادلة (خطيب صديقتك خطيبك) بتاعت بناتنا المفتحات وبنفس الفهم نقول خال وزيرك خالك فيها حاجة؟

حميدتي بحسب (متاريس) التى اعتبرت ان انتقاده للاسلاميين جاء كاول رد فعل على خلفية كلام القيادي الاسلامي الناجي عبد الله الذي هاجم فيه عائلة (آل دقلو) فقال حميدتي ان الذين حكموا السودان ثلاثين عاما عجزوا عن توفير الماء لسكان الخرطوم ! (اااي والله متاريس قالت قال كده) فى اشارة للكيزان (يا خال هسي الدخل الكيزان فى موضوعك مع ترك شنو)؟ والجاب سِيرة الموية شنو؟

اسألني يا عب باسط !

المهم ياصاحبي برضو الملف ده حقو يخلوه مقفول لانو شهادات الميلاد كووولها جوة والسيرة الذاتية و … و …. و عييييك

وما اريد ان اقوله هنا لكل المشفقين على التيار الاسلامي اتركوا الكيزان ما تركوكم فما من احد بالساحة السياسية اليوم الا وله ملف متكامل بايديهم وما من احد عمل معهم سرا اوجهرا الا وله ملف معلوم وما من احد اشتغل طابو خامس او عاشر الا ويعرفونه حق المعرفة ومن لحن القول وما من خائن او خائر او مثبط الا و يعرفونه جيدا ياخي (مش كده وبس) فى واحدين عديل كده ممكن تقول عليهم (صنع فى الانقاذ) يعني زي (made in china) فحقو شنو؟ اى زول عندو ضرس قايم عليه يمشي يقلعوا غادي غادي من الكيزان

فالجماعة ديل (اصصصلا) ما فاضيين ليكم وكلكم (بدوروكم) واحد واحد زي الساعة حسب ترتيب الاولويات ! فيا جماعة ما تنسوا الدنيا صيام كمان .

 

قبل ما انسي :—-

الصحفية الاستاذة سهير عبد الرحيم قالت (سمع اضاني) البرهان قال سنعلن الحكومة الجديدة قبل عطلة عيد الفطر !!

اهااا يا سهير دي يغنوا ليها شنو ؟ يا يوم بكرة ما تسرع مثلا؟ واللا حا تطلع لينا زي (سنعبر) بتاعت اخونا داك؟



المصدر من هنا

زر الذهاب إلى الأعلى