بقلم/صبري محمد علي (العيكورة)
خاص ب [الانتباهة]
بصراحة كده
لو كنت عارف القحاته (حا) يتجهجهوا بالطريقة دي كان رفعت السماعة على (بوبو) وقلت ليهو ياخ الزيارة دي بالله (جليها) يا سعادتك
قول لي الحصل شنو يا استاذ؟
الحصل يا صاحبي …
منذ الامس الخميس ٢٤ اغسطس (بتاع) اليوم العالمي للزلابية
(قال ليك)
الجماعة شغالين سف حلبة وبلع امبرازول ومش عارف نكسيوم وجافيسكون مضغ يعني كل مهدئات المصران
ليه ياجماعة ؟
وصحتكم تهمنا
والحاصل شنو ؟
قال ليك (اللقيمات)
و تانيين يقولوا ليك(ست الشاي)
و آخر يقول ليك (الكرسي)
و واحد يقول ليك زغرودة الست
و واحد يقول ليك التاتشر والتاني يقول ليك مسكتو لكباية القهوة
و واحد يقول ليك عطبرة
يعني ….
تتعدد الاسباب
والمصران واحد !
لكن الحصل اليوم ده
حاجة مش تهيج المصران
دي تفقع المرارة عديل كده على قول شيخنا الطيب مصطفى رحمه الله رحمة واسعة
(فااا) ….
اصبر لي جاييك في الكلام …
سعادة الفريق البرهان يزور اليوم امير كتيبة البراء بمستشفى عطبرة ولدنا (المصباح الزين)
والمصباح يُصر بشدة ويُلح ان لا يُصافح قائد الجيش الا واقفاً شامخاً وبالاحضان كمان
و والدة الامير تشنف المشهد بزغرودة تشق اسماع الوجود .
بالله …
منظر زي ده مش ياهو منظر
(يسر العين)
و بلابل الافراح سجعت تناجينا
مش كانت تستاهل حسين شندي
واللا عبد الله البعيو في رائعته
تسلم يا الهميم تسلم
وقت الحارة تتقدم
يا اب سيفا شرابو الدم
تسلم …
وما لم يقوله البرهان للعالم اليوم هو ..
الله اكبر
و …..
اؤلئك أهلي فجئني بمثلهم
اذا جمعتنا يا جرير المجامع
و حتما سيقولها يوما ما حين يخلع قناع السياسي فلا تستعجلوه .
